مع الاخوان ولا الجيش و الشرطة؟
البوست ده هيزعل كل الناس تقريبا فلو بتدور علي حاجة تخليك تتشفي في الاخوان و تقول يستاهلوا غالبا مش هتلاقي و لو بتدور علي حاجة تخليك تقول ادي الجيش و الشرطة و العنف و قتلوا الشهداء برضو مش هتلاقي.
ملحوظات:
1- البوست يحتوي علي فيديوهات ياريت متقراش الاسم و خلاص ولا تقرا تعليقي عليها و خلاص اتفرج و حكم عقلك و هو ده هدف البوست انك تحكم عقلك بعيدا عن مشاعرك فين.
2- كل ما بين قوسين في كلامي معناه حط تحتيه 100 خط و انت بتقرا او جملة اعتراضية.
3- البوست يعبر عن طريقة تفكيري و ارائي الشخصية و المرجحة للصحة او الخطأ او حتي قد تندرج تحت مصطلح الجنون.
4- لو بتدور علي حاجة تخليك تفهم اكيد مش هتلاقي حاجة في البوست ده و غالبا ممكن ماتفهمش اكتر من الاول.
حقائق:
الجيش و الشرطة: تاريخ الجهازين دول في فض الاعتصامات و التعامل مع المظاهرات عنيف جدا و اغلب الاحيان بتندرج تحت قائمة الجرائم.
الاخوان: تاريخ (الجماعة) غير مشرف و عنيف مليان اغتيالات و ارهاب و طائفية شديدة جدا و تعاملهم السنة اللي فاتت كلها كان عنيف جدا مع المظاهرات اللي اتصدولها بنفسهم و يكادوا يعلوا علي عنف الشرطة في التعامل.
اعتصام النهضة: من كل الفيديوهات و الكلام اللي طلع من امبارح كان في الغالب اعتصام سلمي (نسبة لاعتصام رابعة) مستوي السلاح اللي فيه تقريبا كان خرطوش و (لا اعتقد) ان كان فيه اكتر من كده مع ملاحظة ان خرجت جثث من الاعتصام ده قبل كده عليها علامات تعذيب.
اعتصام رابعة: اعتصام شديد التسليح فيديوهات الاسلحة و الضرب علي الامن كلها تقريبا من رابعة و كان في اسلحة آلية و خرج منه جثث كتير و في تقارير دولية بتثبت وجود حالات قتل و تعذيب ممنهج تم رصدها في الاعتصام ده.
الاعداد:
مبدئيا عشان في ناس بتزعل من الكلام في الاعداد، الاعداد مهمة جدا عشان اعتصام في آلاف لما يموت منه 1000 غير لما يموت منه 10 غير لما يموت منه 100000 و الاعداد بتوضح كمية العنف المستخدم في فض الاعتصام
وزارة الصحة: 159 قتيل و الف و شوية مصاب
الاخوان: 3000 قتيل و 8000 مصاب
وكالة الانباء الفرنسية: 99 قتيل و 700 و شوية مصاب
الجزيرة: ابتدت ب 2200 قتيل و نقصوا ل 300 قتيل!!!!
الشرطة: 43 قتيل من الشرطة و (مش فاكر عدد المصابين)
حقائق2:
عدد الشرطة اللي ماتت امبارح يقارب عدد اللي ماتوا في 1952 لما مات 50 شرطي و المصابين تعدوا عدد المصابين ايامها اللي كانوا 80 شرطي و غالبا دي اكبر (مقتلة مجزرة مدبحة سميها اللي تسميه) للشرطة في تاريخ مصر.
القتلي من المتظاهرين تقريبا مكانش فيهم من المسلحين و في كتير منهم ناس محترمة وجودها في الاعتصام كان لاسباب مختلفة.
اسماء محمد البلتاجي ماتت فعلا و هتي انها طلعت علي الجزيرة تكذب ابوها ده قلة ادب عشان اولا الموت مافيش فيه تهريج ثانيا يوم ما تحصل هتلاقي بدل الفيديو مليون لموقف زي ده و ده فعليا مش موجود ثالثا اسماء شخصية محترمة جدا و مش زي ابوها (و حتي لو زيه) الله يرحمها و يرحمنا كلنا.
فض الاعتصام:
الفض كان مطلب شعبي فعلا و كان تقريبا 95% من المطالبين بالفض بيطالبوا بالابادة التامة مش مجرد الفض و فعلا كره الشعب للاخوان (المبرر) حول الشعب لكائن متوحش خرافي يتمتع بسادية غير طبيعية.
5% من المطالبين بالفض كانوا بيطالبوا بفضه من غير عنف (غالبا كان طلب خيالي و رومانسي لابعد الحدود و انا منهم).
حقائق3:
في كل مرة او احداث بيتم فيها فض اعتصام او مظاهرة كنت بتلاقي فيديوهات كتيرة للجيش و الشرطة و تعاملها العنيف مع المتظاهرين و فيديوهات لضرب النار المرة دي مشوفتش غير فيديوهين لضرب نار من الشرطة غير كده مفيش غير فيديو لقناصة تقدر تفسره علي انهم شرطة و تقدر تفسره علي انه اخوان (لا ينفي وجود تعامل قوي بس بيحط علامات استفهام علي غياب الفيديوهات).
في كل مرة كان بيحصل اشتباكات كنت بتلاقي الناس تقول الاخوان بيضربوا بعض و عادة بيبقي في فيديوهات تؤكد المرة دي مش مختلفة (مش معني كده ان ايا كان العدد هيكون القتلي منهم فيهم عددهم كبير و ممكن يكون القتل منهم فيهم بدون قصد و قلة تدريب ده لو هنبقي حسني النية).
لاول مرة في تاريخ الداخلية و الجيش يسمحوا للاعلام و الصحافة و يصطحبوهم (بدل ما يستهدفوهم) معاهم هما و المنظمات الحقوقية.
ما بعد فض الاعتصام:
اشتعلت حرائق في مصر كلها تقريبا و تم استهداف الكنائس و اقسام الشرطة و المصالح الحكومية، الاخوان بينفوا انهم هما اللي عملوا كده التاريخ و تصريحاتهم و تهديداتهم هما شخصيا بتقول انهم هما الفاعلين الحقيقيين (فيديوهات تحريض علي الاقباط و تصريحات بقتل الشرطة و الجيش منهم شيرت منها امبارح علي لسان خالد الشافعي).
وجهة نظر الاخوان ان الاقباط هما اللي ولعوا في الكنايس (لا تعليق).
وجهة نظر تانية للاخوان ان الجيش و الداخلية هما اللي ولعوا في الكنايس و ده كان ممكن يبقي فيه منطق او حقيقي لو كانت الكنايس في القاهرة انما في القري و الصعيد صعب عشان هناك معروف مين اخوان و مين شرطة فصعب الداخلية تلبسهلهم في الصعيد و القري.
الفيديوهات:
ملحوظة مرة تانية: ماتقراش عنوان الفيديو و خلاص ولا تقرا تعليقي عليه و خلاص ادخل شوف بنفسك الفيديو و حكم عقلك.
1- ده فيديو لمنتقبة اتقتلت و الرصاصة مضروبة في ضهرها
2-سحل متظاهرين علي ايد الشرطة
3-القبض علي الاخوان في الاعتصام
4-جثث الشرطة في كرداسة
5- سقوط مدرعة الشرطة و التمثيل بالجثث
>
6-فيديو مجمع (غالبا من الشرطة) لفض الاعتصام و جرايم الاخوان فيه
7-بداية فض النهضة مفيش سلاح ظاهر (رغم قناعتي ان مكنش مسلح نسبة لرابعة بس مش دليل عدم وجود سلاح) و تعامل الشرطة و الجيش هادي (برضو مش دليل علي عدم وجود عنف)
8-فيديو تلفيق الاسلحة عسكري بيحط الخزنة (مش حقيقي و مش اثبات كلهم بيشيلوا و يحطوا من اول الفيديو) و برضو مايمنعش ان ممكن يكون حقيقي الفكرة ان الفيديو ما يثبتش
9-فيديو طفلة مخنوقة بالغاز و مش هقد الوم غير علي ابوها اللي عارف ان الاعتصام هيتفض و جايبها (الكلام بالانجليزي: الجيش و الشرطة بيقتلوا الاطفال!!! ) ليه الكلام بالانجليزي؟
10-لحظة قنص معتصم في رابعة قناة الحوار (مناشدة انجليزي)
11-قنص من فوق فندق النصر (لا المكان باين هو ايه ولا القناص جسمه ينفع جيش او شرطة متستبعدش انه "مواطنين شرفاء" برضو) مش دليل برضو يعني لو نزل باسم مختلف علي انه اخوان ممكن يتصدق برضو
12-خبي اسم الفيديو و اتفرج هتشوفه زي مانت عايز مافيش دليل برضو مع ملاحظة ان الشرطة و الجيش ما انكروش حرق الخيام و ده اسلوبهم
13-الفيديو الاول من الفيديوهين الوحيدين اللي فيهم ضرب نار واضح و صريح من الداخلية
14-الفيديو التاني اللي فيه ضرب نار واضح و صريح من الداخلية
15-القبض علي الاخوان فيديو في تناقض شديد في طريقة التعامل من خشونة للطف
16-معرفش ده هاون ولا لأ بس واضح انه متفجرات من نوع ما
17-مشاهد من فض الاعتصام واضح فيها التعامل مع الستات و الاطفال هادئ (اكيد كان في تعامل خشن بس الفيديو بينكر خرافة استهداف الستات و الاطفال العجيبة)
ملحوظة: اكيد في فيديوهات اكتر من كده بكتير بس ده اللي شوفته لحد دلوقتي و مش حاطط فيديوهات فيها مراسلين بيتكلموا عشان مفيش قناة محايدة.
اخيرا ممكن اكون انا شخصيا مش محايد و قناعاتي غلبت عليا بس حاولت اكون حيادي علي قد ما اقدر و ربنا يرحم الاموات كلهم.
No comments:
Post a Comment